9 студзеня 2017 года ў Палацы Рэспублікі адбылася ўрачыстая цырымонія ўручэння прэмій Прэзідэнта Рэспублікі Беларусь «За духоўнае адраджэнне», спецыяльных прэмій дзеячам культуры і мастацтва, а таксама спецыяльных прэмій «Беларускі спартыўны Алімп».
Урачыстае мерапрыемства адкрылася прамовай Прэзідэнта Рэспублікі Беларусь Аляксандра Рыгоравіча Лукашэнкі.
«Кожны год у гэтыя студзеньскія дні мы сустракаемся з асаблівымі людзьмі – тымі, хто лечыць нашы душы, хто захоўвае нашу памяць, хто служыць міласэрнасці, дабру і прыгажосці», – адзначыў кіраўнік дзяржавы. «Гісторыя дала нашым творчым людзям унікальны шанец – унесці свой уклад у станаўленне беларускай нацыі. Бо менавіта мы з вамі, цяперашнія пакаленні, ажыццявілі шматвекавую мару нашых продкаў – стварылі першую ў гісторыі незалежную беларускую дзяржаву. І сёння наша агульная задача – зберагчы краіну і перадаць яе свабоднай і незалежнай тым, хто прыйдзе пасля нас», – заявіў беларускі лідар.
Далей Аляксандр Лукашэнка ўручыў узнагароды лаўрэатам.
З прывітальным словам да ўсіх прысутных звярнуўся мітрапаліт Мінскі і Заслаўскі Павел, Патрыяршы Экзарх усяе Беларусі. Архіпастыр адзначыў, што цырымонія ўручэння прэмій Прэзідэнта Рэспублікі Беларусь «За духоўнае адраджэнне» выходзіць за рамкі мерапрыемства і з'яўляецца сапраўднай падзеяй гісторыі сучаснай Беларусі. На думку Патрыяршага Экзарха, сёлетняе свята сведчыць свету пра тое, што згода і дабрабыт у грамадстве ствараюцца толькі на аснове высокіх духоўна-маральных каштоўнасцяў – Богам адкрытых ісцін. Мітрапаліт Павел пажадаў, каб гэты 2017 год быў для Беларусі мірным і шчасным, і заклікаў на ўсіх тых, хто сабраўся, Божае благаславенне.
Затым адбыўся святочны канцэрт. На дадзеным мерапрыемстве прысутнічалі супрацоўнікі і нашага інстытута.
Можна з упэўненасцю сказаць, што галоўныя героі ўрачыстасці робяць свет лепшым і святлейшым. Сваёй актыўнай дзейнасцю яны ствараюць вакол сябе атмасферу дабра і міласэрнасці.
