Супрацоўнікі кафедры эканомікі і кіравання факультэта эканомікі і бізнеса ўдзельнічаюць у міжнародным праекце “Разам для грамады і прыроды: узмацненне працэсу развіцця ў Міёрскім раёне праз супрацоўніцтва мясцовай ўлады і грамадзянскай супольнасці”. Праект рэалізуецца пры фінансавай падтрымцы Еўрапейскага Саюза сумесна з Міёрскім раённым выканаўчым камітэтам, грамадскім аб’яднаннем “Ахова птушак Бацькаўшчыны”, Латвійскім сельскім форумам.
Мэтай праекта з’яўляецца стварэнне дзейнага механізму рэалізацыі стратэгіі ўстойлівага развіцця Міёрскага раёна, пабудаванага на партнёрстве мясцовай улады і структур грамадзянскай супольнасці. Прадугледжваецца практычная рэалізацыя гэтай мадэлі з арыентацыяй на развіццё ініцыятывы і адказнасці мясцовага грамадства, падтрымку біялагічнай і культурнай разнастайнасці, развіццё сацыяльнай інфраструктуры і “зялёнай” эканомікі.
У межах праекта 15 верасня Міёрскі край запрашае ўсіх жадаючых на ўнікальнае экалагічнае свята – “Жураўлі і журавіны Міёрскага краю”.
